Hoʻoponopono
He aliʻi ka laʻi, he haku na ke aloha.
Peace is a chief, the lord of love.
Where peace is, there love abides also.
 — ʻŌlelo Noʻeau #532

Kama‘āina anei ‘oe i kekahi kanaka āu e ‘aelike mau ai 100 pākēneka, ma waho aku o kou hoa o ke aniani kū? ‘A‘ole paha. Pehea nā pākēneka 5 āu e kū‘ē ai? Pehea lā kāu hana? E ho‘okūkū i ka nui loa o ka leo? E ‘imi i ka mea e noho ana i Lanakila ma Maui? 

Ka hoʻoponopono o ka Hawaiʻi

E like ho‘i me ka lō‘ihi o ka noho kānaka, pēlā ka lō‘ihi o ka hihia. Mau nō na‘e ke aloha aku, aloha mai o ka ‘ohana a me nā hoa aloha. Ma ia wā e hihia ai ka pilina, ma ia wā ho‘i e holo pono ‘ole ai kekahi mea, ‘o ka ho‘oponopono akula nō paha ia.

Ma ka ho‘oponopono, ho‘ākoakoa kahi alaka‘i i ka po‘e. He alaka‘i i kama‘āina a hō‘ihi ‘ia e ka po‘e a pau. He kupuna paha. No ia haku ka ‘ike a me ka mākaukau i hiki ke ho‘opili hou aku i ka ‘ohana. No laila, lilo ia alaka‘i ‘o ia ka haku o ka ho‘oponopono.

Pehea ka hoʻoponopono?

‘O ka mua, koho ‘ia ka haku. A laila, e pa‘a nā lula. E ‘aelike ka ‘ohana i ka mālama i ia mau lula.

  1. E ‘aelike ka ‘ohana i ka ho‘oponopono. E ‘aelike ho‘i i ke ka‘ina hana.
  2. E ‘oia‘i‘o wale nō ka ‘ōlelo a ka po‘e a pau.
  3. E aloha kekahi i kekahi. I mea kēia e mālama ‘ia ai ia pilina aloha.
  4. ‘A‘ohe ho‘opuka ‘ia o nā mana‘o i kūkākūkā ‘ia ma waho aku o ka ho‘oponopono.
  5. E ‘aelike ka po‘e a pau i ke kaulike o ka haku.  

He kokua ka ho‘omana i ka ho‘oponopono a me ka ho‘ōla hou i ka ‘uhane. He mea nui ka pule i ke ola o ka Hawai‘i. A, he mea nui ho‘i ka pule i ka ho‘oponopono. No ka ho‘oponopono, he pule ko ka wehena, he pule ko ka panina, a he pule ko waena e like ho‘i me ka nui e pono ai.

Ke ho‘oponopono, komo nō i ka hikaloiloi—ka nānā ‘ana iā ‘oe iho me ka no‘ono‘o i kāu hana a me kou mau mana‘o ma loko o ka hihia. E komo paha i ka mihi no nā hemahema: nā ha‘awina ‘ino o ka na‘au, nā ‘ōlelo ‘ino, nā mana‘o ‘ino, nā hana ‘ino paha. A, komo pū nō ho‘i i ke kala.

Pā‘ina ka ‘ohana ma hope o ka ho‘oponopono. I ka wā ma mua, ho‘okupu ‘ia ka pua‘a i nā akua. Hi‘uwai pū ka ‘ohana. I mea kēia e ma‘ema‘e ai ka na‘au a me ka ‘uhane. A laila ka pā‘ina.

He ka‘ina hana kahiko ka ho‘oponopono. Mau nō na‘e ka pono. Mau nō ho‘i ka mālama ‘ia o ka pilina aloha. Mau nō ho‘i ka ho‘oponopono i ka ‘eha o ka na‘au. Mau nō ho‘i ka ho‘opili hou i nā ‘ohana.

Ma o ka ho‘oponopono, a‘o kākou i ka ho‘oka‘a‘ike pono. Ho‘omaopopo ‘ia mai no ke ko‘iko‘i o ka ‘oia‘i‘o a me ka waiwai o ka mihi a me ke kala. Ma o ka ho‘oponopono e ola pono ai ko kākou ‘ohana. Ma o ka ho‘oponopono kākou e pono ai.